ភ្នំពេញ៖ សមាជិកសភាវ័យក្មេង លោក ហ៊ុន ម៉ានី បាន អបអរសាទរព្រះរាជពិធីបុណ្យអុំទូក បណ្តែតព្រះទីប សំពះព្រះខែ និងអកអំបុក ជាមួយនឹងសារជូនពរ ព្រះមហាក្សត្រ និងពលរដ្ឋខ្មែរទូទាំងប្រទេសក្នុងឱកាសនៃព្រះរាជពិធីបុណ្យនេះ។

លោកហ៊ុនម៉ានីបានសរសេរនៅលើ ហ្វេសបុកផេក របស់លោកនៅព្រឹកថ្ងៃទី៧ ខែវិច្ឆិកា ឆ្នាំ២០២២ នេះថា ថ្វីត្បិតតែមិនអាចរៀបចំព្រះរាជពិធីបាន ដើម្បីត្រៀមរៀបចំកិច្ចប្រជុំកំពូលអាស៊ានដែលកម្ពុជាធ្វើជាប្រធានដឹកនាំ ក៏ប្រជាពលរដ្ឋនៅតែទទួលបានភាពសប្បាយរីករាយតាមរយៈការរៀបចំពិធីបុណ្យនេះ និងកម្មវិធីផ្សេងៗនៅតាមបណ្តាខេត្តជាច្រើន។

លោកថារូបភាពនេះ សរបញ្ជាក់ឱ្យឃើញថា ប្រជាពលរដ្ឋទាំងអស់កំពុងតែអបអរសាទរនូវផ្លែផ្កានៃសុខសន្តិភាព និងការអភិវឌ្ឍដែលបានធ្វើឱ្យមានកំណើនជីវភាព គួបផ្សំជាមួយសមិទ្ធផលរីកស្គុះស្គាយនៃហេដ្ឋារចនាសម្ព័ន្ធរូបវន្តសព្វបែបយ៉ាង។

ជាមួយគ្នានេះដែរ លោកក៏សូមជូនពរដល់ពលរដ្ឋដែលធ្វើដំណើរទេសចរណ៍ទូទាំងប្រទេសទាំងអស់ ចូលរួមថែរក្សាអនាម័យ បរិស្ថាន មានការយោគយល់អធ្យាស្រ័យខ្ពស់ និងជាពិសេសសូមប្រើប្រាស់ដងផ្លូវប្រកបដោយការប្រុងប្រយ័ត្នខ្ពស់ដើម្បីធានាបាន សុខសុវត្ថិភាពទាំងអស់គ្នា៕